Niretzat surfa kostaldeko edozein herritan paseatzen
nabilenean ikusten dudan hori besterik ez da. Ados, ez naiz surfean
aditua, baina ez da beharrezkoa Zarauzko Surf Pro probaren itzulera
albiste ona dela aitortzeko. Eta hobea iruditzen zait emakumeentzat ere
pareko proba bat antolatuko dutela jakin ondoren. Pixkanaka, emakumeak
kirolaren aurreko lerrora salto egiten ari dira.
Estatu espainolean oraindik kosta egiten da, adibidez, neskez soilik
osatutako eskalatzaile taldeak ikustea. Neskak ikusten dira, bai, baina
mutilez inguratuta gehienetan. Estatu frantsesean, ordea, ohikoa da
neska taldeak ikustea eta joera hau gurera etorriko den itxaropenik
badut. Goi mailetan, eskalatzaile ospetsu gehienak gizonak diren arren,
puntako emakume ugari daude. Gizonek emakumeak txalotzen dituzte eta
beraietaz harro daude.
Horrelako jarreren falta sumatzen dut «kirol erregean». Lehen mailan
jokatzen duen futbolari bat dugu herrian. Athleticeko jokalaria da.
Profesionala denetik ez du Gaztetxeak antolatzen duen Futbol Zazpi
Txapelketan parte hartzen, baina iaz ohorezko sakea egiteko eskatu
zioten. Duela gutxi hasi dira Legazpin bere lorpenak aitortzen.
Bere izena Irene da, lehoi eme bat. Askotan galdetzen diot neure
buruari zer gertatuko litzatekeen Irene mutila balitz. Bere izena
eramango lukeen peña bat egongo litzateke seguruenik. Pena ematen dit
San Mameseko belarra gizonen oinentzat besterik ez izateak, neskek
duintasun handiz zapalduko luketelako, utzi dieten partida gutxi
horietan egin duten bezala.
Garan argitaratua.
No hay comentarios:
Publicar un comentario